Karong nibalhin nakog kumpanya, di na nako ni problema. Hapsay na akung lakaw padung opisina ug akong uli gikan trabaho.
Ngano? Tungod kay alas-nwebe na sa buntag ang akung time-in. Kasagaran, mumata kog alas-syete ug muhawa ko sa balay alas-otso. Hapsay na akung biyahe anang mga orasa. Dali nako kasakay ug trisikel. Dali napud ko kasakay ug dyip. Oo, mahulog nga singkuwenta minutos gyapun kasagaran ang ma-konsumo sa biyahe pero di na nako problema ang walay dyip nga mapara padung ug pabalik.
Para lang ma-kumpera ninyo kini sa akung kinabuhi kaniadto, istoryahan tamo sa kasagaran mahitabo sa akua kada buntag katong naa pako sa bangko.
Una, dapat nakagawas nakog balay alas-syete sa buntag. Way problema sa trisikel kay dali ra man ko makasakay. Daghan man ga-istambay sa may kanto. Ang problema kay ang pag-abot sa highway.
Kung maka-agi mu sa may Matina, sa may McArthur Highway, kada buntag, makit-an ninyo nga daghan kaayog tawo naghuwat ug dyip. Halos kada kanto sa highway, naa nay nagtapok nga mga tawo. Estudyante. Mga trabahante. Tanan-tanan na. Parehas ang oras sa time-in sa eskwela o opisina. Parehas pud naghulat ug dyip.
Ang problema diri dapita sa Matina kay kasagaran sa mga dyip na mulabay diri, puno na. Mao na dili na katingalahan sa akua nga maghulat ug dyip unya kinse ka minutos nga na nilabay, 'wa pa gyapun ko kasakay. Ana na siya. Tungod kay daghan kaayog tawo nag-atang. Ug puno-puno na pud ang mga dyip.
Na-istorya nako si Mama kaniadto tungod ani. Ang iyang gitubag kay tungod pud ni sa nahitabo sa siyudad labi na diri sa habagatan. Halos tanan opisina man gud ug eskwelahan sa siyudad naa sa may downtown. Unya halos tanan bag-ong mga residential subdivisions naa sa mga lagyo: Toril, Mintal, Ulas, Bangkal, Calinan, Catalunan Grande, Talomo, Matina Aplaya, ug uban pa.
Tungod ani, pag rush hour, gikan pa lang kuntahay sa Toril o Mintal, puno na ang dyip. Unya, saka pa kung makaabot na sa downtown, munaog ang kasagaran sa mga pasahero. Ang na-ipit hinuon kay ang mga taga-Matina gaya nako.
Naa pud koy na-istorya kaniadto nga tig-convert ug dyip. Ingon pa niya nga 'di naman daw nagapadagdag ug dyip sa dalan ang LTFRB kay close to capacity na ang mga dalan labi na sa Matina. Mao na kung taga-Matina ka ug alas-otso o alas-otso y medya imong time-in, dapat na lang jud magsayu-sayo nakag hawag balay para 'di ka matanggong sa highway sige'g hulat ug dyip.
Gaya sa giingon nako kaganiha, 'di naman ni nako problema. Pero unta ang uban kumpanya dira, mag-isip na pud kung pwede i-flexitime na lang ang uban nilang mga empleyado.
No comments:
Post a Comment