Magbinisaya sa ko ke basi maingnan ko nga ipokrito pagkahuman nakog sulat sa post nani.
Kaganiha, naa koy naka-uban sa dyip nga duwa ka batan-on, usa ka lalake ug usa ka babaye. Sa unang tan-aw nako, mga hayskul pa ang duwa ke presko pag mga nawong.
Mahimong ordinaryo lang sana ang tanan kung wala nibagting ang akong mga dalonggan. Kay katong mupiyong na sana kog mata (kay nirayga na ang dyip), nadunggan nako sila nag-iningles.
Ug dili lang iningles ang akong nadunggan kay ang duwa kuyaw pud kaayo mu-accent! Ug kabalo pud mag-islang-islang! Murag isteyts, pre!
Didto ko medyo nainis ug nagu-ol. Nainis ko ke medyo nahanginan ko sa gibuhat sa duwa. 'Wa ko ga-ingon nga bawal mag-iningles (English major baya pud ko intawon) pero dapat lang pud gamiton ang linggwahe sa tamang lugar. Ug dili tamang lugar ang usa ka dyip nga puno ug pasahero gikan San Pedro.
Sa tinood lang, nahilasan jud ko sa duwa ug ang mas makalagot pa kay halata nga wala sila kabalo nga hilas ang ilahang gibuhat.
Ika-duwa, nagu-ol ko sa duwa ka batan-on. Unsa mani sila uy? Wala ba sila kabalo nga pwede sila ma-kidnap sa ilang sinultihan? Kung sa akua pa lang, naka-sinati nako nga Atenista ang duwa ug datu ke nagsige man ug iningles. Unya, kung naay dautan nga tawo didto sa among grupo, sa tan-aw ninyo dili siya mag-isip nga datu pud ang mga ginikanan sa mga batan-on nato?
Haay. Kabalo mo sa akong gibuhat sunod? Nipiyong na lang jud ko ug naminaw sa ilahang duwa nag-istorya.
Mura jud ug korek ang duwa.
No comments:
Post a Comment